Jan Kløvstad har sendt inn denne artikkelen via sideblikk.agderposten.no:
Under leiing av Grete Vestøl Brekka og Nils Brekka har ein effektiv dugnadsgjeng rydda stien heilt frå Grastein innanfor Moen i Austre Moland via Skrattereid og heilt opp til Skrattereidknuten.
Skrattereidknuten, 225 meter over havet, ligg akkurat på grensa mellom Froland, Tvedestrand og Arendal.
Toppen er det høgaste punktet i gamle Moland kommune.
I Friluftslivets veke i Arendal var Nils Brekka turleiar for 41 frammøtte. Dei fekk med seg interessant og nyttig kunnskap om området, glimrande formidla. Men i skauen innanfor Øynesvannet har det vore eit par vintrar med mykje snø.
I bakken frå tjenna innanfor den gamle garden Skrattereid og opp mot toppen var det mange toppbrekk og rotvelt over stien.
Etter avtale med grunneigar Knut B. Aall rydda dugnadsgjengen heile stien på ein dag.
Initiativtakarane og Jens Tveite, Olav Lillevåje, Nils Åge Vikingsdal og Alf M. Venemyr stilte med traktorar, motorsager og solid arbeidslyst. Dei rydda også stien heilt frå Grastein og fekk fram restane av det gamle vasshjulet folka på Skrattereid hadde ved bekken ned mot Øynesvannet.
Nå er det god sti til Skrattereidknuten både frå Austre Moland, Holt og Bøylestad i Froland. Og på toppen er det utsikt i alle retningar.
Etter Friluftslivets veke i fjor blei det merka og rydda sti frå Almannavegen innanfor Haugås i Froland til Arendals høgaste punkt Høgsteinsheia. I år blei ei ny gruppe inspirert til dugnadsinnsats. Det blir stadig lettare å kome seg til nye turmål.