Johnsen streka under at fleire av momenta aktoratet har nytta mot Skare, aldri hadde vore saksopplysningar viss ikkje Skare hadde vore ærleg i sine forklaringar.
– Det blir brukt mot min klient at han tipsa ein journalist om kniven i nakkestøtta. Men det veit politiet berre fordi Skare sjølv sa det. Journalisten hadde aldri oppgjeve kjelda si. Kor er logikken i at Skare sjølv sa dette viss han er så utspekulert som aktoratet meiner, sa forsvararen.
Johnsen slo fast at alt aktoratet har i saka, er indisier.
– De må vere nær 100% sikre på at Skare lyg på alle punkt, viss de skal døme han. Eg ber dykk frikjenne min klient fullstendig, sa han i sin sluttprosedyre.
I sin sluttprosedyre la aktor Arne Kjønstad ned påstand om 30 dagar ubetinga fengsel for den tiltalte presten Arne Skare.

Synfaring

Tingretten i Valle var på synfaring med den tiltalte sognepresten, Arne Skare, på Rotemo i dag. Der måtte Skare forklare korleis han hamna i grøfta utan bremser i fjor sommar.
I sin sluttprosedyre la aktor Arne Kjønstad ned påstand om 30 dagar ubetinga fengsel for den tiltalte presten Arne Skare. Kjønstad drog fram køyreturen til Rotemo, der Skare hevdar han ikkje oppdaga varselljosa i bilen då bremsene svikta, som fellande bevis. Kjønstad slo dessutan fast at truverde til Skare var svært lågt.
Dom faller onsdag. Forsvararen varslar at dersom Skare blir domfelt, vil saka bli anka.

Mange teoriar

Aktor meinte det var påfallande at Skare si ivrig peika på moglege gjerningsmenn.
– Men då han freista peike ut tidlegare prest Theis Salvesen, og fekk beskjed om kor alvorleg falske skuldingar er, reverserte han mykje av dette, sa Kjønstad.
Kjønstad skisserte i alt sju punkt for å underbygge av Skare sjølv står bak alle hendingane. Han forklarte motivet med ein prest som ikkje fekk til jobben sin, og i jakta på ein veg ut hadde behov for sympati og støtte.
På mange vis er det denne køyreturen som er det store usikre momentet i saka mot sognepresten som er tiltalt for falsk anmeldelse og falsk forklaring. I løpet av rettssakas første dag makta ikkje aktoratet å kome med noko som helst fellande bevis mot Skare. Den tiltalte fekk likevel forklaringsproblem i samband med utforkøyringa.

Såg ikkje varselljosa

Aktor Arne Kjønstad hadde vondt for å forstå at ein mann under trugsmål, slik Skare hevdar han var i fjor sommar, ikkje oppdaga varselljos i bilen då bremsene og spinnkontrollen svikta. På veg frå prestegarden i Valle til Rotemo seier Skare han ikkje bremsa ei einaste gong.
– Eg lærte å køyre mellom anna i små lastebilar. Då gjaldt det å sjå langt fram, og å bremse med gira. Det har eg vorte vand med etterpå, var forklaringa Skare hadde på dette.
Synfaringa på den same strekninga i dag skulle vise kor truverdig den forklaringa er. Retten køyrte same strekninga som Skare den sundagsmorgonen han var på veg til Bykle og konfirmasjonsgudsteneste. På Rotemo gjekk tingretten gjennom dei fysiske forholda, og det vart i tillegg gjennomført køyre- og bremsetestar der. Seinare i dag er det tid for sluttprosedyrar frå aktor og forsvarar.