Oppfatninga av Salvesen som mogleg avsendar av trusselbrev baserte Skare på ei telefonsamtale med den tidlegare presten i Valle og Bykle. I eit notat skrive av Skare og levert politiet i Valle, går det fram at Salvesen skal ha ”bede Skare kome seg tilbake til nord, der han høyrer til”, og at Salvesen skulle ”demonstrere at dette var alvorleg meint”.

–Samtalar med Theis etterpå fekk meg vel til å endre oppfatning om at han stod bak. I tillegg trur eg ikkje Salvesen var edru under telefonsamtalen, og det var kan hende meir eit rop om hjelp enn noko seriøst, sa Skare i retten i dag.

Hadde slagvåpen

I retten i dag kom det fram at den dagen Skare hamna i grøfta ved Rotemo, hadde han eit slagvåpen med seg i kofferten sin.

–Eg var desperat, og måtte gjere det eg kunne for å førebu meg på kva som helst. Eg er ikkje stolt av dette i dag, sa han under utspørjinga frå aktor Arne Kjønstad.

Aktor spurte Skare ut både om oppvekst i Finnmark og studiar i Noreg og USA. Han freista teikne eit bilete av ein person med ein tendens til å hamne i trøbbel, med avslutta studiar, eit halvt år i Libanon, og arbeidsuhell som gravar på Hurum. Aktor hadde problem med å forstå at Skare kunne køyre heilt frå prestegarden i Valle til Rotemo utan å oppdage varselljos eller merke at bremsene i bilen var defekte.

–Eg var nok for oppteken av andre ting den dagen. Heile turen bremsa eg ned på gira, heilt til lampa ljoste ved brua over mot Homme. Då eg skulle bremse og svinge ved Rotemo gjekk pedalen i botnen, sa Skare, som hevda at han berre hugs abrotstykke av resten av hendinga .