Redaktør Inger Stavelin har fleire gonger blitt truga med «Pressens Faglige Utvalg», utan at ho mister nattesøvnen av den grunn. Også prominente personar i kommunale stillingar har kasta seg ut i debatten med liv og lyst.

Dette siste har skapt ein «delikat» situasjon for leiinga i kommunen. Offentleg tilsette skal vere lojale mot arbeidsgjevaren, samstundes som dei har ytringsfridom, som alle andre borgarar i landet vårt. Dette er bakgrunnen for at politikarane onsdag skal vedta eit nytt informasjonsreglement for Åmli kommune. Her brukar dei Lillesand som førebilete. Lillesand har hausta mykje ros for eit liberalt reglement, som gjev dei tilsette stor fridom til å uttale seg i pressa.

I følge framlegget til informasjonreglement for Åmli, kan alle tilsette gje faktaopplysningar om sitt eige arbeidsfelt, så lenge dette ikkje blir omfatta av teieplikta. Dei kan også delta i den generelle debatten om aktuelle saker i bygda, men då skal det vere som privatpersonar. Dei kan ikkje underteikne slike ytringar med til dømes stillingstittel eller kommunal e-post adresse.